Tula Para kay Ma’am

Siya’y isang taong huwaran

Boses at karunungan ang siyang puhunan

Mga ginintuang aral sa aming isip ay iniwan

Upang aming baunin sa aming paglisan.

 

Sa landas ng buhay siya’y nagsisilbing gabay

Magagandang aral sa amin kanyang inialay

Pagmamahal sa amin ay walang kapantay

Kami’y itinuring na parang anak niyang tunay.

 

Kahit na kami ay mga batang makulit

Na sa kanyang ulo ay nagbibigay pasakit

Pagpapasenya sa amin ay di niya parin pinagkakait

At sa kanyang mga labi’y may mga ngiting nakapagkit.

 

Sa aming pangangailangan siya ay nariyan

Naging tunay na magulang sa paaralan

Mga hinaing namin kanyang pinakikinggan

Ito ay di namin kailanman malilimutan.

 

Maliit na sahod ay di niya alintana

Basta’t sa aming isip, kaalama’y dapat maipunla

Ma’am, ikaw ay napakadakila

Iyong itinuro’y dadalhin hanggang sa aming pagtanda.